Loksins loksins gef ég mér almennilegan tíma til þess að blogga. Ég hef reynt það nokkrum sinnum en alltaf hefur færslan dottið út, svo að ég hef ekki nennt að gera það aftur fyrr en núna.
Það er allt fínt að frétta af mér. Skólinn gengur svona almennilega þannig séð. Ég tók kjörbókar
prófið í ensku fyrir nokkru og fékk fyrir það 9,5 sem ég er bara mjög ánægð með. En stærðfræðin hins vegar gengur ekki nógu vel. Lokaprófið er 3. desember og er ég 5 vikum á eftir áætlun. Sem er ferlega slæmt. Annars hef ég fengið ágætis einkannir fyrir prófin í stærðfræði sem ég hef tekið í gegnum netið. Meðaleinkunn þar er cirka 5 eða þar um bil. Núna er bara að duga eða drepast, bretta bara upp ermar og kýla á það að klára allt fyrir próf. Annars er svo ensku prófið 10. desember og ekki kvíði ég fyrir því.

Annars er ég að slasa mikið slasa mig í vinnunni. Ég þurfti endilega að reka höfuðið svo illilega í brauðhilluna þegar ég var að beygja mig eftir poka sem ég missti á gólfið, og endaði á að fá sár... Ég ákvað svo að fara í Lyfju í Lágmúla til að kaupa sárakrem og plástur til að setja á þetta, enda vissi ég að ég ætti ekki að þurfa að fara til læknis. En mér er vísað til sjúkraliða sem segir mér að fara á læknavaktina. Þegar þangað er komið, segir læknirinn mér það að ekkert þyrfti að gera við þessu. Takk fyrir en ég borgaði 2200 krónur fyrir að láta segja mér eitthvað sem ég vissi fyrir að þyrfti ekki að gera. En svo í dag rak ég hníf í einn puttann en ekkert sár kom sem betur fer. Svo var það á tímabili sem ég var alltaf hreint að reka fingur í, eða hendina og fá sár. Á endanum var það nú hætt að vera fyndið! En svo hætti það þangað til á miðvikudaginn þegar ég rak höfuðið í, ég hef verið eitthvað að meiða mig alveg síðan þá. En ekki þýðir að kvarta yfir því.

En mikið hrikalega er farið að styttast í jólin. Mér finnst eins og síðustu jól hafi bara verið í síðustu viku. Ég hef ákveðið það að vera hér í bænum um jólin, ég hef bara ekki efni á því að fara austur. Það er svo dýrt að fljúga. Ekki nema fólk leggi eitthvað i púkk svo að ég komist austur rétt yfir jólin, og það yrði jólagjöfin til mín í ár.... Bara smá hugmynd :-) En kannski of mikið spurt, en fátt um svör.

Annars langar mig til að vera dugleg að blogga í desember. Blogga eitthvað á hverjum degi, eða jafnvel bara að koma með tengil á eitthvað fallegt jólalag eða setja inn einhverja jólamynd. Reyndar kemur sumt af þessu frá henn Fjólu, hún kom með þessa hugmynd á síðunni hjá sér. Er ekki í lagi að ég hermi eftir þér Fjóla??

Eitt enn, ef þið fjölskylda mynduð vilja panta eitthvað af jólasmákökum og tertum fyrir jólin hjá mér, endilega farið að láta mig vita svo að ég geti þá lagt inn pöntun fyrir ykkur. Við erum semsagt byrjuð í jólabakstrinum. Margt af því er svo hrikalega gott. En ég er samt fegin að ég er ekki að vinna í bakaríinu á Seltjarnarnesi. Ég er ennþá alveg hrikalega sjúk í deig, ég væri algjört "pain in the ass", ef manni leyfist að sletta aðeins (Mamma, þú skilur það kannski best hehe ). Mér finnst deigið oft vera betra en kökurnar sjálfar. Svo að ég er nú fegin að borða ekki neitt af því að viti lengur, þ.e. af kökunum. Enda er ég nánast hætt að borða sætindi yfir höfuð. Ég leyfi mér það ný reyndar einstaka sinnum, en þá er það helst eitthvað bara smá bland í poka á laugardögum. Ekki er ég að fitna mikið af því.

Púff, ég er búin að gera langa færslu hér og vona ég að þið hafið nennt að lesa þetta allt saman. Það er samt svo miklu meira sem ég get sagt ykkur, og ég gæti bætt við meiru af því sem þegar er komið hér. En ég vil ekki vera að þreyta ykur mikið með þessu. Mig langar til að enda þessa færslu á einu af mínu uppáhalds jólalagi.